ကျောက်ကပ်ရောဂါ အသည်းအသန်ဖြစ်နေတဲ့ မိခင်ကြီးရဲ့ ဆေးဖိုးအတွက် သီချင်းဆိုပြရင်း အလှူခံနေတဲ့ ညီငယ်လေး

ကျောက်ကပ်ရောဂါ အသည်းအသန်ဖြစ်နေတဲ့ မိခင်ကြီးရဲ့ ဆေးဖိုးအတွက် သီချင်းဆိုပြရင်း အလှူခံနေတဲ့ ညီငယ်လေး

ရှားရှားပါးပါးရတဲ့ အားလပ်ရက်တိုင်း မိုးတွေအမြဲရွာလို့ ဘယ်မှမသွားဖြစ်ပေမယ့် ဒီအပတ် မဖြစ်မနေ အပြင်ထွက်စရာ ကိစ္စလေးတွေရှိလို့ လှည်းတန်းဘက် ရောက်ခဲ့တယ်။ မိုးတွေက ဆက်တိုက် ရွာနေပေမယ့် လူတွေရှုပ်မြဲ ရှုပ်ဆဲ လှည်းတန်းကတော့ အစဉ်အ လာ ဘယ်တော့မှ မပြောင်းသွားပါဘူး။ Weekend ဆိုတော့ပိုတောင်ရှုပ်သေး။

ဒီလိုနဲ့ လှည်းတန်းရောက်တော့ အသက်လတ်ပိုင်း လူငယ်တစ်ယောက် လှည်းတန်းဂုံးကျော် တံတားပေါ်မှာ ဂစ်တာလေးတစ်လက်လွယ်ပြီး သီချင်းဆို ဖျော်ဖြေနေတာ တွေ့လိုက်ရတော့ စိတ်ထဲတစ်မျိုးလေးဖြစ် သွားတယ်။

ပုံမှန်ဆို ဒီလို Street performance တွေက ကိုယ်တွေဆီမှာ မြင်နေကျ မဟုတ်ဘူးလေ။ Western countries တွေမှာသာ ရင်းနှီးပြီးသား ယဉ်ကျေးမှု တစ်ခုဖြစ်နေတာ။ သူ့ခမျာ ဒီလောက်ရှုပ်နေတဲ့ လှည်းတန်းမှာ လူသံတွေ ကားသံဟွန်းသံတွေကြားထဲက ဂစ်တာလေးလွယ်ပြီး ရှိသမျှခွန်အားနဲ့ သီချင်းလေးတွေဖျော်ဖြေနေတာ၊ အနားမှာလည်း သူဖျော်ဖြေတာကို အားပေးနေတဲ့ လူတစ်ချို့ကိုလည်း တွေ့ရတယ်။

ထူးခြားတာတစ်ခုက သူ့ဘေးမှာ “ အမေ့ဆေးဖိုး Yoe Yoe Myint Swe On The Street ” ဆိုတဲ့ ဆိုင်းဘုတ်လေးကို တွေ့ရတယ်။ အဲတော့မှ နားလည်သွားတာ၊ အော်သူက သူ့ အမေ ဆေးဖိုးအတွက် ဒီလိုဖျော်ဖြေ နေတာပဲဆိုပြီး။ ကိုယ်လည်း စိတ်ဝင်စားတာနဲ့ သူ့ကိုနည်းနည်း သွားစပ်စုခဲ့တယ်။

သူ့နာမည်က ရိုးရိုးမြင့်ဆွေပါ။ ဇာတိက ရှမ်းပြည်နယ် မြောက်ပိုင်း ကျောက်မဲ ခရိုင်ကပါတဲ့။ သူစိတ်အားထက်သန်တဲ့ ဂီတနယ်ပယ်ထဲမှာ လုပ်ကိုင်ဖို့ ရန်ကုန်ကိုရောက်တာ ၆ နှစ်လောက် ရှိပြီလို့ပြောတယ်။ အရင်က မင်္ဂလာပွဲတွေမှာ သီချင်းတွေ လိုက်ဆိုပေးပြီး စားဝတ်နေရေးကို ရုန်းကန်နေခဲ့တာပါ။

ဒီလို အားလုံးကြပ်တည်းနေတဲ့ ကာလမှာ အမေက ကျောက်ကပ်မှာ ရောဂါဖြစ်ပြီး အသည်းအသန်ဖြစ်တော့ ဆေးကုဖို့ပိုက်ဆံ အသည်းအသန် လိုလာတယ်။ အမေဖြစ်သူက ကျောက်မဲမှာ ညီမလေးနဲ့ နှစ်ယောက်တည်း ရှိနေတော့ ဆေးရုံတင်ဖို့ စရိတ်ကို ကိုရိုးရိုးမြင့်ဆွေက ရတဲ့အလုပ် ဝင်လုပ်ပြီး ရသမျှကို အမေတို့ဆီပို့ပေး တယ်လို့သိရတယ်။

လောလောဆယ်မှာ အသိ မိတ်ဆွေတွေနဲ့ ချိတ်ဆက်ပြီး ပစ္စည်းပို့ တဲ့ အလုပ်လုပ်နေပြီးတော့ Weekend တွေမှာ အခုလို Busking လုပ်ရင်း တစ်ဖက်တစ်လမ်းက ဝင်ငွေရှာနေတယ်လို့ သိရတယ်။ သူအခုလို လှည်းတန်း တံတားပေါ်မှာ ဂစ်တာတစ်လက်နဲ့ ဖျော်ဖြေနေတာတွေ့တော့ Busking ဆိုတဲ့ ယဉ်ကျေးမှုလေးကို မြန်မာလူမျိုးတွေ ရင်းနှီး ဖို့လိုနေသေးပါလား ဆိုပြီးတွေးမိတယ်။

Busking ဆိုတာက ကိုယ်တတ်ထားတဲ့ အတတ်ပညာ တစ်ခုခုကို အများပြည်သူနဲ့ သက်ဆိုင်တဲ့ နေရာတွေမှာ အပန်းပြေအောင် ဖျော်ဖြေပေးတာပါ။ ပြောရရင်တော့ Street performer ပေါ့။ အနောက်နိုင်ငံ တွေမှာဆိုရင် လမ်းဘေးမှာ မြေအောက်ဘူတာ ရုံမှာ ပန်းခြံမှာ ဖျော်ဖြေကြတာ မြင်တွေ့နေကျ သာမာန်ပဲဖြစ်တယ် ပေါ့နော်။ ဒါကိုတချို့က တောင်းစားတယ်လို့ ထင်ကြတယ်။

တကယ်တော့ Busking ဆိုတာက အနောက်နိုင်ငံတွေမှာ တ ရားဝင် ခွင့်ပြုထားတဲ့ အလုပ်တစ်ခု အနေနဲ့လုပ်ကြတဲ့ ဖျော်ဖြေမှုတစ်ခုပါ။ Busking လုပ်ကြတဲ့ street performer တွေထဲမှာ သီချင်းဆိုတဲ့သူ၊ အကနဲ့ ဖျော်ဖြေတဲ့သူ၊ မျက်လှည့်နဲ့ဖျော်ဖြေတဲ့သူ၊ ပုံတူဆွဲပြီး ဖျော်ဖြေတဲ့သူ၊ တိရစ်ဆာန်လေးတွေနဲ့ ဖျော်ဖြေတဲ့သူ စသဖြင့် ပေါင်းစုံရှိပါတယ်။

ဒီလို ဖျော်ဖြေတာက ကမ္ဘာလှည့် ခရီးသွားတွေအတွက် ဆွဲဆောင်မှု တစ်ခုအနေနဲ့ ဖြစ်စေပြီးတော့ သူတို့နိုင်ငံရဲ့ အနုပညာ ယဉ်ကျေးမှုကို ထုတ်ဖော်ရာရောက်တဲ့အတွက် အရေးပါတဲ့ ကဏ္ဍကနေ ပါဝင်ပါတယ်။ အနောက်တိုင်းမှာ အခုနာမည်ကြီးနေတဲ့အဆိုတော် တွေထဲမှာ street performer ဘဝနဲ့ စခဲ့တဲ့ အဆိုတော်တွေ အများကြီး ရှိပါတယ်။

အခုအချိန်မှာ Perfect သီချင်းဆိုရင် အားလုံးသိကြတဲ့ အဆိုတော် Ed Sheeran ဟာ တစ်ချိန်က လမ်းဘေးမှာ ဖျော်ဖြေတဲ့သူဘဝနဲ့ စခဲ့တာပါ။ အခုလို မအောင်မြင်ခင်က လမ်းဘေးမှာအိပ်ခဲ့ရတဲ့ ရက်တွေဟာ မနည်းပါဘူးလို့ ဆောင်းပါးတစ်ခုမှာ ဖော်ပြထား တာကိုတွေ့ရတယ်။

သူ့လိုပဲ Justin Bieber, Passenger, Tracy Chapman , Rod Stewart , Steve Martin စတဲ့ နာမည်ကြီးတွေက တစ်ချိန်က လမ်းဘေးမှာ ဖျော်ဖြေတဲ့သူတွေဘဝနဲ့ သုညက စခဲ့ကြတဲ့ သူတွေပါ။ ကိုယ်တတ်ထားတဲ့ အတတ်ပညာ အနုပညာကို ရိုးရိုးသားသား အများပြည်သူရှေ့မှာဖျော်ဖြေပြီး အားပေးလို့ရလာတဲ့ဝင်ငွေက သမ္မာအာဇီဝကျတယ်လို့ သီရိတော့ထင်ပါတယ်။

အဲဒီလိုဆိုတော့ Busking နဲ့ သိပ်မရင်းနှီးသေးတဲ့ မြန်မာနိုင်ငံမှာ အခုလို ဖျော်ဖြေတဲ့ Street performer လေးတွေ တွေ့ရတော့ အားပေးမိတယ်။ နောက်လည်း ဒီလို စိတ်အပန်းပြေ လွတ်လွတ်လပ်လပ် ပျော်လို့ရတဲ့ ယဉ်ကျေးမှုလေး ခေတ်စားလာဖို့ မျှော်လင့်မိတယ်။ ဒီနေ့တော့ “ဘုရားဖူးရင်း လိပ်ဥတူးရင်း” ပဲ ပစ္စည်းဝယ်ဖို့သွားရင်းက သီချင်းလေးတွေ လိုက်ဆိုရင်း ပျော်ခဲ့ရပါတယ်။

ကိုရိုးရိုးမြင့်ဆွေ Busking လုပ်တာလေးကို စိတ်ဝင်စားကြတဲ့လူတွေတွေ့လို့ပါ။ သူကတော့ အပတ်စဉ်စနေနေ့တိုင်း လှည်းတန်း ဂုံးကျော်တံတားမှာ (၂ နာရီ ၃ နာရီ) တနင်္ဂနွေနေ့တိုင်း မြေနီကုန်း တံတားအောက် ဒဂုံစင်တာ ၂ ရဲ့ အရှေ့ (၁ နာရီ ၂ နာရီ)  ဖျော်ဖြေတယ်လို့ သူ့ရဲ့ဖေ့စ်ဘွတ် အကောင့်မှာ ဖော်ပြထားပါတယ်ရှင့်။ သူ့ကို အားပေးချင်တဲ့သူများ ဝိုင်းဝန်း supportလုပ်ပေးလို့ရပါတယ်။ ခရက်ဒစ်

Add a Comment

Your email address will not be published. Required fields are marked *