ဖားကန့်မြို့ပေါ်ရှိ ရပ်ကွက် ၄ ခုတွင် ရေကြီးရေလျှံမှုများ ဖြစ်ပေါ်နေ

ဖားကန့်မြို့ပေါ်ရှိ ရပ်ကွက် ၄ ခုတွင် ရေကြီးရေလျှံမှုများ ဖြစ်ပေါ်နေ

တောင်ပေါ်ဒေသဖြစ်သည့် ကချင်ပြည်နယ်၊ ဖားကန့်မြို့နယ်တွင်း ဥရုချောင်း ရေများ လျှံတတ်လာသဖြင့် ဖားကန့်မြို့ပေါ် ရပ်ကွက် ၄ ခုတွင် ရေကြီး၊ ရေလျှံမှုများ ဖြစ်နေသည်။

လက်ရှိတွင် ရေကြီးရေလျှံမှု ဖြစ်ပွားနေသည့် ရပ်ကွက်များမှာ ငှက် ပျောတော၊ အေးမြသာယာ၊ မြို့မ နှင့် မရှီကထောင် ရပ်ကွက်တို့တွင် ဖြစ်ပြီး ငှက်ပျောတော ရပ်ကွက်သည် မြို့၏ အနိမ့်ပိုင်းတွင် တည်ရှိသဖြင့် အမြင့်ဆုံး ၁၀ ပေခန့် ရေကြီးနေသည်ကို တွေ့ရသည်။ကျန်ရပ်ကွက်များတွင် လမ်းပိုင်း အချို့တွင်သာ ရေကြီးနေသော်လည်း ကား၊ ဆိုင်ကယ်များ ဖြတ်သန်းရန် ခက်ခဲသဖြင့် လှေများ အသုံးပြုပြီး လမ်းဖြတ်ကူးနေရသည်။

ဖားကန့်မြို့၊ အေးမြသာယာ ရပ်ကွက်တွင် နေထိုင်သည့် ရပ်မိရပ်ဖ တဦးဖြစ်သူ ဦးလှဝင်းက “ ရေကြီးရတဲ့ နောက်ခံ အကြောင်းအရင်းက ဥရုချောင်းကြီးကို စွန့်ပစ်မြေစာတွေ ပုံတော့ မိုးရွာတာနဲ့ ဥရု ချောင်းထဲကို အကုန်ရောက်တာ၊ ချောင်းက ကောသွားပြီ။ ကောသွားတော့ မြေသားတွေ မြင့်တတ်လာတော့ ရေလေး နည်းနည်း များတာနဲ့ လျှံပြီး ရပ်ကွက်တွေ အကုန်ဝင်တာ ”ဟု ပြောသည်။

ဖားကန့်မြို့မှ ဌာနဆိုင်ရာများ၊ ရပ်မိရပ်ဖများ၊ ကျောက်စိမ်းတူးဖော်သည့် ကုမ္ဗဏီများမှပူးပေါင်းပြီး ၂၀၂၀ ခုနှစ်၊ ဖေဖော်ဝါရီမှ စ၍ ဥရု ချောင်း ရှင်းလင်းရေး အဖွဲ့ဖွဲ့ကာ ချောင်း ရေစီးရေလာ ကောင်းရေးအတွက် အမှိုက်များ၊ ချောင်းတွင်း ပိတ်ဆို့နေသည့် မြေစာများကို ဆယ်ယူ သည့် လုပ်ငန်းကို ရက် ၁၀၀ စီမံကိန်းဖြင့် လုပ်ဆောင်မှုများလည်း ရှိသည်။

“ ကျနော်တို့မှာ စက်ယန္တရား မလုံလောက်တာ၊ ကျူးကျော်တဲတွေက နေရာယူထားတော့ စက်ယန္တရားတွေသွားလို့ မရတဲ့ နေရာတွေမှာ ချောင်းဆယ်မရတာ တွေလည်း ဖြစ်တယ်။ လုပ်လို့ ရတဲ့ နေရာမှာတော့ ရေစီးရေလာကောင်းအောင် လုပ်ထားပေမယ့် ရေအားနဲ့ ဆယ်ထားတဲ့နေရာနဲ့ မမျှဘူး ဖြစ်နေတယ် “ဟုလည်း ဦးလှဝင်းက ဆိုသည်။

ဖားကန့်မြို့အခြေစိုက် Green Land သဘာဝ ပတ်ဝန်းကျင်ထိန်းသိမ်းရေးအဖွဲ့ ၊ ဥက္ကဌ ဦးယိန်းခေါက ဥရုချောင်းတလျောက်တွင် ရွှေတူးဖော်မှုများ၊ မြေစာပုံများ စွန့်ပစ်ခြင်းနှင့် ချောင်းကို ပိတ်ဆို့ပြီး မြေဖို့ခြင်း တို့ကြောင့် ရေကြီးရေလျှံမှုများ ဖြစ်ရသည်ဟု ပြောသည်။

ဦးယိန်းခေါက ရေကြီးရေလျှံမှုမှာ အစိုးရတွင် တာဝန်ရှိပြီး အစိုးရမှချောင်းရိုးတလျှောက် လုပ်ပိုင်ခွင့် ချပေးထားသည့် ရွှေလုပ်ကွက်များ၊ မြေစာပုံများကြောင့် ဒေသခံများက ရေကြီးမှုဒဏ်ကို ခံနေရခြင်း ဖြစ်သည်ဟုလည်း ဆိုသည်။

ဖားကန့်မြို့နယ်တွင်း အသေးစားနှင့် လက်လုပ်လက်စား ရွှေလုပ်ကွက်များကို တရားဝင် တူးဖော်ခွင့်ကို ပထမဆုံး အကြိမ်အဖြစ် ကချင်ပြည်နယ်၊ သယံဇာတနှင့် သဘာဝ ပတ်ဝန်းကျင် ထိန်းသိမ်းရေး ဝန်ကြီးဌာနမှ ၂၀၁၉ ခုနှစ်တွင် စတင် ခွင့်ပြုပေးခဲ့ခြင်း ဖြစ်သည်။

ကချင်ပြည်နယ်၊ သတ္တုတွင်းဦးစီးဌာန၏ ၂၀၁၉ ခုနှစ်အတွင်း ထုတ်ပြန်ချက်အရ ဖားကန့်မြို့နယ်၊ လုံးခင်း ရတနာ နယ်မြေအတွင်း စုစု ပေါင်း ၅၃၆၄၀ ဧက ကို တူးဖော်ခွင့်ပြုရန် စီစဉ်ကြောင်းလည်း သိရသည်။

ကချင်ပြည်နယ် အစိုးရအဖွဲ့သည် ရွှေတူးဖော်မှုများ တရားမဝင် ပြုလုပ်ခြင်းကြောင့် သဘာဝ ပတ်ဝန်းကျင် ပျက်စီး ထိခိုက်ကြောင်းနှင့် တရားမဝင် တူးဖော်မှုကို ဟန့်တားနိုင်ရန် ရည်ရွယ်ပြီး တရားဝင် လုပ်ကွက်များ ချပေးသော်လည်း ဖားကန့်မြို့နယ်တွင်း သဘာဝပတ်ဝန်းကျင် အရေး တတ်ကြွ လှုပ်ရှားသူများက ဥရုချောင်းတလျောက် ရွှေတူးဖော်မှုများကို ကန့်ကွက်နေကြသည်။ Source ; The Irrawaddy

Add a Comment

Your email address will not be published. Required fields are marked *