ကိုဗစ်ကြောင့်သေဆုံးမှုများနေခြင်းက အခြေအနေဆိုးမှ ဆေးရုံကို ရောက်လာကြခြင်းကြောင့်ဟုဆို

ကိုဗစ်ကြောင့်သေဆုံးမှုများနေခြင်းက အခြေအနေဆိုးမှ ဆေးရုံကို ရောက်လာကြခြင်းကြောင့်ဟုဆို

မြန်မာနိုင်ငံမှာ ကိုဗစ် ၁၉ ရောဂါဖြင့် စက်တင်ဘာ ၂၆၊ ၂၇ နဲ့ ၂၈ ရက်နေ့တွေမှာ စံချိန်တင် အရေအတွက် အဖြစ် ၈၂ ဦးအထိ သေဆုံးမှုရှိခဲ့တာကို သတင်းအချက်အလက် တွေအရ သိရပါတယ်။

မြန်မာနိုင်ငံမှာ လက်ရှိဖြစ်ပွားနေတဲ့ ကိုဗစ်-၁၉ ဒုတိယလှိုင်းကာလအတွင်းမှာ ဆေးရုံမရောက်ခင်နဲ့ ဆေးရုံကိုအရေးပေါ် အခြေအနေနဲ့ ရောက်ရှိလာပြီးမှ သေဆုံးမှုများပြားနေတာကို ကျန်းမာရေးနဲ့ အားကစားဝန်ကြီးဌာနရဲ့ သတင်းအချက်အလက်တွေအရ သိရပါတယ်။

စက်တင်ဘာလအတွင်း ထုတ်ပြန်ချက်တွေအရ ကိုဗစ်-၁၉ ရောဂါပိုးကြောင့် သေဆုံးသူအများစုဟာ သေဆုံးပြီးမှ swab ယူစစ်ဆေးခဲ့ကာ ကိုဗစ်-၁၉ ရောဂါပိုး ရှိသူတွေဖြစ်ကြောင်းကို သိရှိရခြင်းဖြစ်တယ်လို့သိရပါတယ်။ ဒီနေ့ည သတင်းထုတ်ပြန်မှာလည်း သေဆုံးသူ ၃၀ ဦး မှာ ၁၅ ဦးက ဆေးရုံမရောက်ခင်ကတည်းက သေဆုံးပြီးဖြစ်တယ်လို့ ဖော်ပြပါရှိပါတယ်။

အခုလို လူနာအများစု ဆေးရုံမရောက်ခင်ကတည်းက သေဆုံးမှုတွေရှိနေတာက ကိုဗစ်ကြောက်လို့ ဆေးရုံမလာရဲကြရာကနေ ရောဂါအခြေအနေ ပိုမိုပြင်းထန်လာခြင်းကြောင့်ဖြစ်တယ်လို့ ရန်ကုန်ပြည်သူ့ဆေးရုံကြီး အရေးပေါ်ဆေးပညာဌာမှ ပါမောက္ခဌာနမှူး ဒေါက်တာမော်မော်ဦးက သုံးသပ်ပါတယ်။

” အဓိက ဘာကြောင့်လဲဆိုတော့ နံပါတ် (၁) ကတော့ လူနာတွေက တခြားရောဂါတွေနဲ့ တွဲနေတာတွေများတယ်။ နံပါတ် (၂) ကတော့ လာတဲ့အချိန်မှာ အမောဖောက်တာတို့ တခြားရောဂါတွေ ဆိုး နေတာတို့ပါတယ်။ ကိုဗစ်သီးသန့်လို ယူဆရတဲ့လူနာတွေက လူငယ်တွေပဲဖြစ်လိမ့်မယ်။ ကိုဗစ်သီးသန့်က ဥပမာ လူ ၁၀၀ သေတယ်ဆိုရင် ငါးယောက်လောက်ပဲ ပါမယ်။ ၅ ရာခိုင်နှုန်းကတော့ ကိုဗစ်သီးသန့်လို ပြောချင်ပြောနိုင်တာပေါ့။ ကျန်တဲ့ လူနာတွေကတော့ တခြားရောဂါတွေကြောင့် ဒါဆုံးမှာပါပဲ။

နံပါတ် (၁) ကတော့ ကိုဗစ်ကြောင့်ဆေးရုံကို မလာဘဲနဲ့ ကိုဗစ်တွေကိုကြောက်ပြီး ဆေးရုံကိုစောစောစီးစီးမပြဖြစ်ပဲနဲ့ အိမ်မှာ ဆိုးနေတဲ့ အချိန်ကျမှလာပြီးတော့ တကယ်က ကိုယ့်မှာရှိတဲ့ ရောဂါပိုးကို ကိုဗစ်က ပိုဆိုးအောင်လုပ်လိုက်တဲ့ သဘောပေါ့။ ဒါကြောင့် တကယ်က အသက်အန္တရာယ်ရှိတာ။ ဒါကြောင့် အသက်ကြီးတဲ့သူတွေ ရောဂါအခံရှိတဲ့သူတွေက ပိုဆိုးတာ။” လို့ ဒေါက်တာမော်မော်ဦး ကပြောပါတယ်။

ရောဂါအခံ ရှိသူတွေအနေနဲ့ သေလုမြောပါး စအခြေအနေရောက်မှ ဆေးရုံကို မလာဖို့၊ ကိုဗစ်ကိုကြောက်လို့ အိမ်မှာကြိတ်မကုဖို့၊ ရောဂါအခံရှိသူတွေအနေနဲ့ လိုအပ်တဲ့ဆေးဝါးတွေကို ကြိုတင်စုဆောင်းထားတာမျိုးတွေကိုလည်း လုပ်ထားသင့်တယ်လို့ ဒေါက်တာမော်မော်ဦးက အကြံပြုပြောကြားခဲ့ပါတယ်။ ကိုဗစ်ကြောင့်သေဆုံးမှုနှုန်းလျော့နည်းစေရန်အတွက် ကျန်းမာရေးနဲ့အားကစားဝန်ကြီးဌာနအနေနဲ့လည်း အထူးကုသခန်း ICU တွေကို ထပ်မံတိုးချဲ့ပြင်ဆင်နေတယ်လို့သိရပါတယ်။

စက်တင်ဘာလ ၂၈ ရက်နေ့ညအထိ စာရင်းအရ မြန်မာနိုင်ငံမှာ ကိုဗစ်-၁၉ ရောဂါပိုးကြောင့်သေဆုံးသူ ၂၅၆ ဦးအထိရှိနေပြီး စက်တင်ဘာ ၂၆၊ ၂၇ နဲ့ ၂၈ ရက်နေ့တွေမှာ စံချိန်တင် အရေအတွက်အဖြစ် ၈၂ ဦးအထိ သေဆုံးမှုရှိခဲ့တာကို ကျန်းမာရေးနဲ့အားကစားဝန်ကြီးဌာနရဲ့ သတင်းအချက်အလက်တွေအရသိရပါတယ်။ Source ; Duwun

Add a Comment

Your email address will not be published. Required fields are marked *