မြန်မာနိုင်ငံမှာသာရှိသည့် ပုပ္ပားမျောက်မြီးရှည်မျိုးစိတ်သစ် မျိုးတုံးပျောက်ကွယ်မှုမရှိစေရေး ထိန်းသိမ်းရန်လိုအပ်နေ

မြန်မာနိုင်ငံမှာသာရှိသည့် ပုပ္ပားမျောက်မြီးရှည်မျိုးစိတ်သစ် မျိုးတုံးပျောက်ကွယ်မှုမရှိစေရေး ထိန်းသိမ်းရန်လိုအပ်နေ

ပြီးခဲ့သည့် နိုဝင်ဘာလ ဒုတိယ အပတ်အတွင်း နိုင်ငံတကာသုတေ သန အဖွဲ့အစည်းများက မျိုးစိတ်သစ်အဖြစ် အတည်ပြု သတ်မှတ်လိုက်သော ကမ္ဘာပေါ်တွင် မြန်မာနိုင်ငံမှာသာရှိသည့် ပုပ္ပားမျောက်မြီးရှည် မျိုးစိတ်သည် မျိုးတုံးမည့် အန္တရာယ်ဖြင့် ရင်ဆိုင်နေရခြင်းကြောင့် အချိန်မီဝိုင်းဝန်းကာကွယ် ထိန်းသိမ်းရန်လိုအပ်ကြောင်း အပြည်ပြည်ဆိုင်ရာ တောရိုင်းတိရစ္ဆာန်နှင့် သဘာဝအပင်အဖွဲ့- ( မြန်မာ) FFI မှ မြန်မာနိုင်ငံ အစီအစဉ်မန်နေဂျာ ဦးငွေလွင် က ပြောသည်။

မြန်မာနိုင်ငံ၏ ဒေသရင်း မျိုးစိတ်ဖြစ်သည့် ပုပ္ပားမျောက်မြီးရှည် မျိုးစိတ်သည် သစ်ရွက်စား မျောက်မျိုးစိတ်များမှ မျိုးစိတ်တစ်ခုဖြစ်ပြီး အခြားသိရှိပြီး မျိုးစိတ်များနှင့်လည်း အမွေးအရောင်၊ အမြီးအရှည်နှင့် အရိုးအဆစ်များ ကွဲပြား ခြားနားကာ ကောင်းမွန်သော သစ်တောနယ်မြေများ၌ တွေ့ရလေ့ရှိသည်ဟု ဆိုသည်။

“ဒီမျောက်မျိုးစိတ်က တစ်ကမ္ဘာလုံးမှာ မြန်မာနိုင်ငံမှာပဲရှိတာ၊ အရင်တုန်းက မျောက်မျက်ကွင်းပြာလို့ သိထားတာကနေပြီး DNA နဲ့ စစ်ပြီးတဲ့ အခါကြမှ မျိုးစိတ်အသစ် ပြန်ပြီး ထွက်လာတာဖြစ်တယ်။ ပုပ္ပားတောင်ကိုဂုဏ်ပြုပြီး ပုပ္ပားမျောက်မြီးရှည်လို့ ခေါ်ဆိုတာဖြစ်တယ်။ အခုဆိုရင် ပုပ္ပားမျောက်မြီးရှည်မျိုးစိတ်ဟာ မျိုးတုံးလုနီးပါးအန္တရာယ်နဲ့ ရင်ဆိုင်နေရပါတယ် ”ဟု မြန်မာနိုင်ငံ အစီအစဉ်မန်နေဂျာ ဦးငွေလွင်က ပြောသည်။

ပုပ္ပားမျောက်မြီးရှည်ကို သုတေသန ပြုလုပ်ခဲ့ရာတွင် မြန်မာနိုင်ငံဒေသ လေးခုတွင် အကောင်ရေ ၂၀၀ မှ၂၅၀ သာ ကျန်တော့ကြောင်း၊ ပုပ္ပားတောင်တွင် အကောင်ရေ ၁၀၀ ကျော်ခန့်တွေ့ရှိရသဖြင့် အကောင်ရေ အများဆုံးတွေ့ရှိသည့် ဒေသအဖြစ်မှတ်တမ်းတင်အတည်ပြုထားကာ အချိန်မီကာကွယ်ထိန်းသိမ်း မစောင့်ရှောက်နိုင်ပါက မျိုးတုံးပျောက်ကွယ်သွားနိုင်ကြောင်း အပြည်ပြည် ဆိုင်ရာ တောရိုင်းတိရစ္ဆာန်နှင့် သဘာဝအပင်အဖွဲ့-( မြန်မာ)မှ တာဝန်ရှိသူများက ပြောကြားသည်။ Source ; The Mirror Daily

Add a Comment

Your email address will not be published. Required fields are marked *