ပိုက်လိုင်း တလျှောက် လုံခြုံရေး တိုးမြှင့်ရန် တရုပ်ဘက်မှ တောင်းဆိုမှုကို စစ်ကောင်စီမှ သဘောတူပေးခဲ့ရ

ပိုက်လိုင်းတလျှောက် လုံခြုံရေးတိုးမြှင့်ရန် တရုပ်ဘက်မှတောင်းဆိုမှုကို စစ်ကောင်စီမှ သဘောတူပေးခဲ့ရ

မြန်မာနိုင်ငံ အလယ်ကို ခါးပိုင်းဖြတ်သွားသည့် ကျောက်ဖြူ -ယူနန် တရုတ်ပိုက်လိုင်း တလျှောက် ရဲစခန်း ၅၉ ခုဖြင့် စောင့်ကြပ်နေသော်လည်း လုံခြုံရေးတိုးမြှင့်ပေးရန် တရုတ်နိုင်ငံခြားရေး ဝန်ကြီးဌာနက စစ်ကောင်စီကို တောင်းဆိုလိုက်သည်။

ဖေဖော်ဝါရီ ၂၃ ရက်နေ့တွင် တရုတ် – မြန်မာ စီမံကိန်းကြီးများ၏ လုံခြုံရေးဆိုင်ရာ အွန်လိုင်းအစည်းအဝေး ဆွေးနွေးပွဲတွင် ယင်းသို့ထည့်သွင်းတောင်းဆိုခဲ့ခြင်း ဖြစ်သည်။ ယင်းအစည်းအဝေးကို မှတ်တမ်းတင်ထားသည့် လျှို့ဝှက်အဆင့်ရှိ စာတွင် ယင်းသို့ ဖော်ပြထားသည်ကို မဇ္ဈိမက တွေ့ရှိခဲ့ ရခြင်းဖြစ်သည်။

တရုတ်ဘက်မှ နိုင်ငံခြားရေး ဝန်ကြီးဌာန၊ ပြည်ပလုံခြုံရေး ဦးစီးဌာန၏ ညွှန်ကြားရေးမှူးချုပ်၊ တရုတ်ပိုက်လိုင်း (CNPC)၏ ဒုတိယမန်နေဂျာနှင့် တရုတ် သံအမတ် ချင်းဟိုင် (Chen Hai)တို့ တက်ရောက်ခဲ့ကြသည်။ တရုတ်နိုင်ငံခြားရေးညွှန်ချုပ်က မြန်မာနိုင်ငံတွင် တရုတ် ဆန့်ကျင်ရေးများ မြင့်တက်လာ ကြောင်းနှင့် ပိုက်လိုင်းများ ဖျက်ဆီးရန် လှုံ့ဆော်မှုများ ကြုံနေ ရကြောင်း ထည့်သွင်းပြောဆို ခဲ့သည်။

ထို့အပြင် မြောက်ပိုင်းမဟာမိတ် တပ်ဖွဲ့များဖြစ်သော ရက္ခိုင့်တပ်တော်(AA)၊ တအာင်း အမျိုးသား လွတ်မြောက်ရေးတပ်မတော် (TNLA) နှင့် ကိုးကန့်တပ်ဖွဲ့ (MNDAA) တို့၏ အနေအထားကြောင့် ထိခိုက်မှုရှိလာနိုင်သည့်အတွက် တရုတ်ဝန်ထမ်းများ၏ လုံခြုံရေးကိုပါ စိတ်ပူကြောင်းဆိုသည်။ မြောက်ပိုင်းမဟာမိတ် သုံးဖွဲ့သည် စစ်ကောင်စီအာဏာသိမ်းမှုတွင် မည်သည့်မှတ်ချက်မှမပြုဘဲ နှုတ်ပိတ်နေ၍ ပြည်သူများက တရုတ်နိုင်ငံ၏ သြဇာခံများအဖြစ် စွပ်စွဲထားသည့်အဖွဲ့များဖြစ်သည်။

မြန်မာနိုင်ငံဘက်မှ ဦးဆောင်ခဲ့သည့် ရဲမှူးချုပ် အောင်ဌေးမြင့်က ပိုက်လိုင်းတ လျှောက် ရဲတပ်ဖွဲ့က လုံခြုံရေး အပြည့်အစုံ မပေးနိုင်၍ အချို့နေရာများတွင် တပ်မတော်က တာဝန်ယူ ဆောင်ရွက်ကြောင်း၊ ပိုက်လိုင်း မြေပြင်သတင်းအချက်လက်များ စုဆောင်းပြီး တရုတ်နှင့် ဆွေးနွေးလျှက်ရှိကြောင်း ထည့်သွင်း ပြောဆိုခဲ့သည်။

တိုင်းရင်းသား လက်နက်ကိုင်များ၏ အခြေအနေကို တရုတ်ဘက်က ကြိုတင်သိရှိသဖြင့်၊ ယင်းအချက် လက်များကို မျှဝေ ပေးစေလိုကြောင်း မြန်မာနိုင်ငံခြားရေးဝန်ကြီးဌာန ဒုတိယ ညွှန်ကြားရေးမှူး ဒေါ်မြတ်သီတာအေးက တောင်းဆိုခဲ့သည်။ တရုတ်နိုင်ငံခြားရေး ညွှန်ချုပ်က မြောက်ပိုင်းမဟာမိတ် တပ်များ၏ အချက်အလက်ကို စစ်ကောင်စီထံ မျှဝေပေးမည်ဟု ကတိပြုခဲ့ပြီး၊ မြန်မာအနေဖြင့်လည်း နိုင်ငံ၏ လုံခြုံရေး အခြေအနေကို တရုတ်နှင့်မျှဝေရန်လိုကြောင်းဆိုခဲ့သည်။

ဆွေးနွေးပွဲတွင် တရုတ်၏ ပိုးခါးပတ် လမ်းမကြီး (BRI) စီမံကိန်းများနှင့် တရုတ်ကုမ္ပဏီ ဝန်ထမ်းများ၏ လုံခြုံရေးကိစ္စရပ်များကိုပါ ထည့်သွင်းဆွေးနွေးသော်လည်း ပိုက်လိုင်းလုံခြုံရေးကို ဦးစားပေး ဆွေးေ နွးခဲ့ကြသည်။ တရုတ်က ယင်းပိုက်လိုင်းသည် BRI၏ အရေးအကြီးဆုံး အစိတ်အပိုင်းဖြစ်သည်ဟု ဆိုထားသည်။ တရုတ်ပိုက်လိုင်းသည် ဦးသိန်းစိန် ခေါင်းဆောင်သော ကြံ့ခိုင်ရေးအစိုးရ လက်ထက်တွင် အကောင် အထည် ဖော်ခဲ့ခြင်းဖြစ်ပြီး၊ နှစ်စဉ်ဒေါ်လာ သန်းရာချီ ရှာပေးနေသော စီမံကိန်းတစ်ခုဖြစ်သည်။

ဆွေးနွေးပွဲ မှတ်တမ်းအရ တရုတ်နှင့် စစ်ကောင်စီတို့၏ ဆွေးနွေးမှုတွင် တစ်လကျော် အတွင်း လူပေါင်း ၅၀ ကျော်ကို စစ်ကောင်စီက သတ်ဖြတ်ထားမှု၊ ထောင်နှင့်ချီသော ထိန်းသိမ်း ထားခံထားရသူများကိစ္စနှင့် အကြမ်းဖက်ဖြိုခွင်းနေသည့် ကိစ္စရပ်များကို ထည့်သွင်းပြောဆိုခြင်းပင် မရှိပေ။

မြန်မာနိုင်ငံဘက်မှ ရဲမှူးချုပ် အောင်ဌေးမြင့် နှင့် နိုင်ငံခြားရေးဝန်ကြီးဌာနမှ ဒုညွှန်ချုပ် ဒေါ်မြတ်သီတာအေး၊ ညွှန်မှူး ဒေါ်နီလာစိုး၊ ညွှန်မှူး ဒေါ်ဖြူဖြူစိုးတို့ တက်ရောက်ခဲ့ကြောင်း အစည်းဝေး မှတ်တမ်းတွင် ပါရှိသည်။ Source ; Mizzima

Tags:

Add a Comment

Your email address will not be published. Required fields are marked *