လျှပ်စစ်ဓာတ်အားပြတ်တောက်ရသည့် အကြောင်းအရင်းများကို ဗဟုသုတအနေဖြင့် ဖော်ပြပေးလိုက်ပါတယ်

လျှပ်စစ်ဓာတ်အားပြတ်တောက်ရသည့် အကြောင်းအရင်းများကို ဗဟုသုတအနေဖြင့် ဖော်ပြပေးလိုက်ပါတယ်

လျှပ်စစ်ဓာတ်အား ပြတ်တောက်သည့် အကြောင်း အရင်းများကို လျှပ်စစ်ဓါတ်အားသုံးစွဲသူ ပြည်သူများ ဗဟုသုတအနေဖြင့် သိရှိနိုင်ပါရန် နှင့် အခက်အခဲ အခြေအနေ အကြောင်းရင်းများကို သိရှိနိုင်ပါရန် ဖော်ပြအပ်ပါသည်။

‘ဓါတ်အားပြတ်တောက်ရခြင်း အကြောင်းရင်းများ’

1.System Breakdown

2.Line Fault

3.Shut Down

4.Load Shed

1.System Breakdown

System Breakdown ဆိုသည်မှာ တစ်နိုင် ငံလုံးကို လျှပ်စစ်ပေးနေသော ဓာတ်အားစနစ် တစ်ခုလုံး၌ လျှပ်စစ်ဓာတ်အား ပြတ်တောက်သွားခြင်း ဖြစ်သည်။ ထိုအချိန်တွင် ဓာတ်အားပေးစက်ရုံ အတော် များများက အလိုအလျောက် ထိန်းချုပ် စနစ်များကြောင့် ရပ်တန့်ကုန်သည်။

အချို့သော ဓာတ်အားပေးစက်များက ဓာတ်အား ထုတ်ခြင်းမရှိပဲ စက်လည်လျှက် ( Full Speed, No-Load condition ) ဖြစ်ကုန်သည်။ အချို့သော ဓာတ်အားလိုင်းများက အလို အလျောက် ပိတ်သွားကြသည်။ တနည်းအားဖြင့် တစ်နိုင်ငံလုံး လျှပ်စစ်မီး အမှောင်ကျသွားခြင်း ဖြစ်သည်။ ထိုကိစ္စကို မြန်မာပြည်သူများ ယခင်က မကြာခဏ တွေ့ကြုံခံစား ကြရသည်။

ထို့ကြောင့် ပြည်သူတွေနှင့် မီဒီယာ အကြားတွင် “ စစ်စတန် ဘရိတ်ဒေါင်း ” ဟူသော အင်ဂျင်နီယာ အသုံးအနှုန်းတစ်ခုမှာ တရင်းတနှီး ဖြစ်သွားခဲ့ဖူးသည်။ သို့သော် ပြည်သူတွေက ထိုသို့ တွေ့ကြုံရမှုကို မနှစ်သက်ပါ။ထို့အတူ လျှပ်စစ်ဝန်ထမ်းများက ပို၍ မနှစ်သက်ပါ။ ဖြစ်လာခဲ့လျှင် အလွန်စိတ်ပင်ပန်း၊ လူပင်ပန်း ဖြစ်ကြရပါတယ်။

တစ်နိုင်ငံလုံးမှာ ရှိတဲ့၊ ဓာတ်အားပေးစက်တွေရဲ့ အခြေအနေတွေကို မေးရင်း၊ စက်တစ်လုံးပြီး တစ်လုံးကို ပြန်မောင်းနိုင်ဖို့၊ စက်တွေကို ပြန်တွဲ နိုင်ဖို့၊ ဓာတ်အားလိုင်းတွေကို တစ်လိုင်းပြီး တစ်လိုင်း ဓာတ်အားပြန်လွှတ်နိုင်ဖို့၊ ထိုသို့ လုပ်ကြရင်းနဲ့ အမှားအယွင်း ကင်းကင်းနဲ့ မြန်မြန်ထက်ထက် ဆောင်ရွက်နိုင်ဖို့၊ ကိုယ်စွမ်း ဥာဏ်စွမ်းရှိသမျှဖြင့် တွေ့ကြုံနေရတဲ့ မတူညီသော အခြေအနေ အမျိုးမျိုးကြားမှာ ပြည် သူတွေ လျှပ်စစ်မြန်မြန် ပြန်ရဖို့အတွက် ဇောချွေးပြန်ကာ ဆောင်ရွက်ကြရ ပါတယ်။ ဒီကြားထဲမှာ ဝိုင်းပြီးပို့တဲ့ မေတ္တာတွေကို အဟောသိကံ ခံယူကြရင်းနဲ့ပေါ့။

System Breakdown ဖြစ်စေနိုင်သော အကြောင်းရင်း များစွာ ရှိပါသည်။ အဖြစ်အများဆုံး ကိစ္စရပ်မှာ ဓာတ်အား ထုတ်လုပ် နိုင်မှုထက် ဓာတ်အား သုံးစွဲ မှုက အလွန် ပိုမို များပြားလာ သည့် အချိန်တွင် Under-Frequency Protection ဖြင့် စက်များ Trip ဖြစ်၍ ရပ်တန့်ကုန်တတ်သည်။

တစ်ခါတစ်ရံ၌ လျှပ်စစ် များစွာ စီးဆင်းနေသော ဓာတ်အားလိုင်းကြီး တစ်ခု၌ လိုင်းအပြစ် တစ်မျိုးမျိုး ဖြစ်ပေါ်ခြင်းကြောင့် အလိုအလျောက် ထိန်းချုပ် စနစ်က အပြစ် (Fault) ရှိနေသော ထိုဓာတ် အားလိုင်းကို ဓာတ်အားစနစ်မှ ဖယ်ရှားသည့်အခါ ကျန်ဓာတ် အားလိုင်းများ ကပါ အပိုဝန်ကို ထပ်ထမ်းရန် မနိုင်ရာမှ System Breakdown ဖြစ်ရတတ်သည်။

သဘာဝဘေး အန္တရာယ်များကြောင့် ဓာတ်အားစနစ်အတွင်းရှိ အရေးကြီးသော လျှပ်စစ် စက်ပစ္စည်းများ ထိခိုက် ပျက်ဆီးရာမှ လည်း System Brea kdown ဖြစ်ရတတ်သည်။ ဓာတ်အားလိုင်းကြီးများ၏ အောက်တွင် လူက တောင်ယာ မီးရှို့ကြရာမှဖြစ်စေ၊ သဘာဝတောမီး လောင်မှုကြောင့်ဖြစ်စေ၊ လိုင်းများ Trip ဖြစ်ကာ ကြုံရတတ်ပြန်သည်။

အမျိုးမျိုးသော အကြောင်းများကြောင့် မည်သို့ပင်ဖြစ်စေ၊ ကောင်းသော ဖြစ်ရပ် မဟုတ်ပေ။ System Breakdown ဖြစ်သည် ဆိုသည်မှာ ကောင်းသော အခြေအနေ မဟုတ်။ မဖြစ်လေ ကောင်းလေ ဖြစ်သည်။ ထို့ကြောင့် လျှပ်စစ်ဝန်ထမ်း အားလုံးက ဝိုင်း၍ ကြိုးစားကြရသည်။

2.Line Fault

ဓာတ်အားလိုင်း အပြစ်ဖြစ်ခြင်းကို ဆိုလိုခြင်းဖြစ်ပါသည် ။ ဓာတ်အားလိုင်းအပြစ်ဖြစ်နိုင်သည့် အကြောင်းအရင်း များစွာရှိပါသည်။ (ဓာတ်အားလိုင်း ပေါ်သစ်ပင်ပိ ၊ တိုင်ကျိုး၊ကြိုးပြတ်ကျ၊ ကြွေသီးကွဲ စသည်ဖြင့် ဓာတ်အားလိုင်းနှင့်ပက်သက်၍ ချို့ယွင်းချက် ဖြစ်ပေါ် ခြင်းကို ဆိုလိုခြင်းဖြစ်ပါသည် ။ Perm anent line fault ဖြစ်ခဲ့လျှင် ဓာတ်အားလိုင်း တစ်လျှောက် လိုင်းအပြစ်လိုက်လံ ရှာဖွေပြုပြင်ပြီးမှ ဓာတ်အားပြန်လည်ပို့လွှတ်ရတာဖြစ်သောကြောင့် ဓာတ်အားပြတ်တောက်ချိန် အနည်းငယ်ကြာမြင့် တတ်ပါသည်။

3. Shut Down

ဓာတ်အားလိုင်းနှင့် ဓာတ်အားခွဲရုံများ ကြံ့ခိုင် ကောင်းမွန်စေရန် အတွက် ဓာတ်အားပိတ်၍ ထိန်းသိမ်း ပြုပြင်ခြင်း လုပ်ငန်းများ ဆောင်ရွက်ရခြင်း ဖြစ်ပါသည် ။ ထိုသို့ ဆောင်ရွက်မှသာ ဓာတ်အားလိုင်းအပြစ်ဖြစ်ပေါ်မှု (line fault) နှင့် ဓာတ်အားခွဲရုံ ချို့ယွင်းမှုများနည်းပါးပါမည်။shut down ဆောင်ရွက်သည့်အခါ ဓာတ်အားပြတ်တောက်မည့် နေ့ရက်နှင့် အချိန်တို့အား ကြိုတင် အသိပေးပြီး ဆောင်ရွက်ကြပါသည်။

ရံဖန်ရံခါ မှာတော့ ဓာတ်အားပေးထားစဉ် ဓာတ်အားလွှတ်ထားသည့် စက်ပစ္စည်း (သို့) ဓာတ်အားလိုင်းများ ချို့ယွင်းလာသည့် အခြေအနေများ တွင်လည်း အရေးပေါ် shut down များ ဆောင်ရွက်ရသည့် အခါ များလည်း ရှိတတ်ပါသည်။ ဓာတ်အားပြတ်တောက်မှု ကြာချိန်မှာ လုပ်ငန်းဆောင် ရွက်ရမည့် ပမာဏပေါ် မူတည်ပါသည်။

4.Load Shed

လာပါပြီခင်ဗျ Load shed ဒီရက်ပိုင်း တွေ့ကြုံနေရတဲ့ ဓာတ်အားပြတ်တောက်မှုပေါ့ ။ မြန်မာနိုင်ငံ ဓာတ်အားစနစ်သည် ရေအားလျှပ်စစ်ကို အဓိက အခြေပြုထားတဲ့ ဓာတ်အားစနစ် ဖြစ်ပါသောကြောင့် နွေရာသီတွင် ဓာတ်အားထုတ်လုပ်မှု အနည်းငယ် လျော့ကျပါသဖြင့် ဓာတ်အားထုတ်လုပ်နိုင်မှုနှင့်ဓာတ်အားသုံးစွဲမှု ဟန်ချက်ညီစေရန် ၊ ဓာတ်အားစနစ် တည်ငြိမ်စေရန်၊

(System Breakdown မဖြစ်စေရန်) အတွက် ဆောင်ရွက်ရခြင်းဖြစ်ပါတယ် ။ ထို့အပြင် ဓာတ်အားစနစ်မှ ဓာတ်အားနိုင်နင်းသော်လည်း မိမိတို့အား ဓာတ်အားပေးထားသော ထရန်စဖော်မာမှ ဝန်အားနိုင်နင်းမှု မရှိလျှင်လည်း ယင်းထရန်စဖော်မာကို အဆင့်မြှင့်တင်မှု မလုပ်နိုင်ခင်ကြား ကာလမှာလည်း load shed များဆောင်ရွက်ရလေ့ ရှိပါတယ်။ နွေရာသီ မီးသုံးအများဆုံး အချိန်များတွင် ဆောင်ရွက်ရလေ့ ရှိပါတယ်။ ဓာတ်အားပြတ်တောက်မှု ကြာချိန်မှာ နာရီဝက် ၊ တစ်နာရီခွဲ ၊ နှစ်နာရီ ကြာမြင့်တတ်ပါသည်။

အထက်ပါ အကြောင်း အရာများကြောင့် ဓာတ်အားပြတ်တောက်မှုများအား နည်းပါးစေရန်အတွက် လျှပ်စစ်ဌာနအနေဖြင့် ကြိုးစားဆောင်ရွက်နေပါကြောင်းနှင့် မီးသုံးသူပြည်သူများအနေဖြင့်လည်း ဓာတ်အားပြတ်တောက်မှုများ တွေ့ကြုံလာခဲ့ပါကလည်း နားလည်သည်းခံပေးပါရန် လေးစားစွာ ပန်ကြားအပ်ပါသည်။

လျှပ်စစ်ဓာတ်အားပေးတယ်ဆိုတာ ထင်သလောက်မလွယ်ကြပါဘူး နည်းပညာ အဆင့်ဆင့်နဲ့ ထိန်းချုပ်ထားမှ အပျက်အစီး အသေအပျောက်နည်းမှာပါ မိတ်ဆွေတို့ကို အသိပေးရုံသက်သက်ပါ မပြည့်မစုံဘဝမှာ ရုန်းကန်နေရသော လျှပ်စစ်ဝန်ထမ်းများကို စာနာကြည့်ရုံသက်သက်ပါ ။ မူရင်းရေးသားသူအား ခရက်ဒစ်ပေးပါတယ်ခင်မျာ ။

Add a Comment

Your email address will not be published. Required fields are marked *